വിദ്യാഭ്യാസരംഗത്ത് മുസ്‌ലിങ്ങള്‍ നേട്ടങ്ങള്‍ കൊയ്തു - പി.കെ. ബഷീര്‍ എം.എല്‍.എ

അരീക്കോട്: കഴിഞ്ഞ ഏതാനും വര്‍ഷങ്ങളില്‍ മുസ്‌ലിം സമൂഹത്തിന് വിദ്യാഭ്യാസരംഗത്ത് നേട്ടങ്ങള്‍ കൊയെ്തടുക്കാന്‍ സാധിച്ചിട്ടുണ്ടെന്നും ഇതില്‍മുജാഹിദ് പ്രസ്ഥാനത്തിന്റെ പങ്ക് വളരെ വലുതാണെന്നും പി.കെ. ബഷീര്‍ എം.എല്‍.എ പറഞ്ഞു. പുത്തലം മഹല്ല് സംഗമത്തിന്റെ ഭാഗമായി നടന്ന അവാര്‍ഡുദാനം ഉദ്ഘാടനംചെയ്ത് പ്രസംഗിക്കുകയായിരുന്നു അദ്ദേഹം. കെ.എന്‍.എം സംസ്ഥാന ജന. സെക്രട്ടറി എ.പി. അബ്ദുല്‍ഖാദര്‍ മൗലവി മഹല്ല് സംഗമത്തിന്റെ ഉദ്ഘാടനം നിര്‍വഹിച്ചു. അന്ധവിശ്വാസങ്ങള്‍ക്കും അനാചാരങ്ങള്‍ക്കുമെതിരെ മുജാഹിദ് പ്രസ്ഥാനം നടത്തിയ പ്രവര്‍ത്തനങ്ങള്‍ ലക്ഷ്യം കണ്ടുതുടങ്ങിയതായി അദ്ദേഹം പറഞ്ഞു.

മഹല്ല് സംസ്‌കരണമെന്ന വിഷയത്തില്‍ ഡോ. സുല്‍ഫിക്കറലിയും ജീവിതലക്ഷ്യമെന്ന വിഷയത്തില്‍ ഹാരിസ്ബ്‌നു സലീമും പ്രബന്ധമവതരിപ്പിച്ചു. കെ.എന്‍.എം ശാഖ സെക്രട്ടറി കെ. മുഹമ്മദ്‌റാഫി സ്വാഗതവും ഐ.എസ്.എം സെക്രട്ടറി യു. ഫിറോസ് നന്ദിയും പറഞ്ഞു. കെ.എന്‍.എം പൊതുപരീക്ഷയില്‍ ഏഴാംക്ലാസില്‍ സംസ്ഥാനത്ത് ഒന്നാംറാങ്ക് നേടിയ അസ്‌ല ഹാഷിമിനും അഞ്ചാംക്ലാസ്സില്‍ ഒന്നാംറാങ്ക് നേടിയ ഫില്‍ദ ഇസ്മായിലിനും മെഡിക്കല്‍ എന്‍ട്രന്‍സ് പരീക്ഷയില്‍ 183-ാം റാങ്ക് നേടിയ ജിഷാദ് മുഹമ്മദ് റാഫിക്കും വിവിധ പരീക്ഷകളില്‍ ഉന്നതവിജയം നേടിയവര്‍ക്കും ചടങ്ങില്‍ അവാര്‍ഡുകള്‍ സമ്മാനിച്ചു. കുട്ട്യാലി, ഹബീബ് റഹ്മാന്‍, പി. വീരാന്‍കുട്ടി, ആത്വിഫ് എന്നിവര്‍ പ്രസംഗിച്ചു.